Salah Amireh - صلاح عميرة

بحلم بالتطور الايجابي، بحلم بتمكين الشباب، بحلم بالتغيير والرقي بأفكارنا وأفعالنا.
تربينا على بعض الأفكار والمعتقدات اللي ما بتصب بمصلحتنا، كبرنا على كتير من العادات والتقاليد اللي ما بتساعدنا في تطورنا، رسخنا هاي المفاهيم من دون التفكير بمدى صلاحيتها.

بحلم أشوف طريقة تفكير مختلفة عن الي تعودنا علي، بحلم أشوف تتغير بطريقة تفكيرنا ونظرتنا للحياة، بحلم أشوف شباب واعي بسعى الى التغيير، بتقبل الاخرين، بتقبل النقد البناء، مدرك لما حوله، مبدع، معطاء، بحترم الاختلاف، بحترم آراء الآخرين، حلمي أشوف قادة بالمجتمع، بساعدو الآخرين على التطور والنمو، حلمي نشوف بعض بالمضمون، بالعقل، بالمحبة، بالود، ونبعد عن الشكل والمادة.

حلمي نشوف الخير بداخل كل انسان، ونساعد بعضنا البعض، نطلق العنان للقوة اللي بداخلنا، ونمكن الناس اللي حولينا يطلعو القوة اللي بداخلهم.

حلمي مش بعيد، حلمي مش مستحيل، حلمي قريب، أنا برفض وبكل شدة المعتقد أنه عالمنا بعبد كل البعد عن التغيير، أنا برفض كل شخص بقول مستحيل، أنا مؤمن بأن التغيير قادم، أنا مؤمن بأن التغيير موجود في كل انسان، أنا مؤمن بأن التغيير ظاهرة سريعة الانتشار، أنا مؤمن بأن كل شخص فينا قادر على تغيير نفسه، ومساعدة الأشخاص اللي حوليه، أنا مؤمن بأن تغيير شخص واحد في المجتمع، تغيير فئة صغيرة في المجتمع رح يوصلنا لتغيير فئة أكبر، ويوم تاني فئة أكبر، لحتى بيوم من الأيام نرتقي ونوصل لأسمى أيات الوعي، الادراك، المعرفة والتطور.

حلمي مش مكان رح أوصله، حلمي هو رحلة رح أعيشها كل يوم، حلمي مش خيال، حلمي هو قصة... قصة رح أحكيها كل يوم، قصة رح أحكيلك اياها، قصة رح أحكيها لأحفادي، قصة رح يعشيها كل جيل من بعدي و كل جيل من بعدك.